एमाले नेता महतको निधन

काठमाडौं, कार्तिक २२ - एमाले केन्द्रीय सदस्य एवं पूर्व राज्यमन्त्री डिल्लीबहादुर महतको निधन भएको छ । मस्तिष्क पक्षघातबाट पीडित महतको बुधबार बिहान ११ बजेर २० मिनेटमा मनमोहन मेमोरियल अस्पतालमा निधन भएको एमाले प्रचार विभाग सचिव सूर्य थापाले जनाएका छन् । उनको आईसीयूमा राखेर उपचार भइरहेको थियो ।

महतको शवलाई मध्यान्ह १२ देखि दिउँसो ३ बजेसम्म पार्टी मुख्यालय बल्खुमा श्रद्धाञ्जलीका राख्ने थापाले जानकारी दिए । माधवकुमार नेपालको सरकारमा महत शान्ति तथा पुननिर्माण राज्यमन्त्री थिए । जुम्लाबाट सोमबार उनलाई हेलिकप्टरबाट काठमाडौं ल्याइएको थियो । महतको बुधबार नै अन्तिम संस्कार गर्ने कार्यक्रम छ ।